fbpx

| News

ORANJESTAD: E situacion di desperdicio riba nos isla ta tumando rumbonan alarmante. Diferente dump ilegal a wordo detecta  memey di barionan residencial, sin lubida cu e dump oficial na Parkietenbos casi no tin luga pa pone desperdicio mas. Gobierno di su banda ta buscando partner nan pa bin cu un solucion pa e problema aki como tambe pa elimina e cantidad di dump ilegal cu tin tur caminda ya cu ta tuma e problema di desperdicio hopi na pecho.

E ser humano ta central y esaki ta encera su salud y bienestar y pa e principal motibo aki e ta buscando solucion pa e cantidad di desperdicio cu tin y ta enfocando riba concientisacion di e conducta di e poblacion cu ta biba riba e baranca aki.

Kiko ta un dump ilegal?

Wel, esey ta tur desperdicio cu wordo tira riba tereno priva y publico enbes di wordo tira na Parkietenbos manera mester ta. E problema di mas grandi ta e falta di conscientisacion di nos hendenan kendenan hopi biaha no ta realisa e importancia di un bon maneho di desperdicio, cuminsando na cas mes.

Casnan, curanan y barionan limpi ta conduci na menos enfermedad y tambe menos plaga di bestianan indesea manera djaca y cacalaca y siguramente esaki ta un forma pa evita criadero di sangura tambe cu ta causa malesanan manera dengue, zika, west nile y chikungunya. Pa e motibo aki e responsabilidad di limpiesa ta cuminsa na cas mes. Ta nos deber como ciudadano pa tene nos cura di cas limpi, tene nos bario limpi, stop di tira sushi den mondi (y unda cu ta) y hopi importante ta pa nos minimalisa e cantidad di desperdicio domestico. Na momento cu cada un di nos  crea menos  desperdicio innecesario na cas of trabow ta pone cu Aruba en general ta minimalisa sushedad creando menos desperdicio na Parkietenbos cu ta causando daño na nos medio ambiente.

Serlimar ta ofrece un servicio amplio y optimal pa yuda deshaci di desperdicio residencial pero tambe comercial. Serlimar ta pasa cu su trucknan pa piki tur desperdicio como tambe ofrece containernan di diferente size pa ora di haci limpiesa. Unabes cla, nan mes ta busca e containernan y asina ta facilita e proceso. Asta di cualkier evento, Serlimar ta asisti den e area di limpiesa pa lage manera mester ta. Pa mas informacion di tur servicio di limpiesa disponibel, tuma contacto cu Serlimar na telefon (297) 5245080 of bishita nan website www.serlimar.aw.

  

Comments are closed.