fbpx

| Choosezero, News

Mas y mas comerciantenan local ta poniendo cabes hunto y tumando accion den cuadro cu prohibicion di importacion y produccion di productonan di plastic di solo uzo, Oxybenzone y Styrofoam entrante 1 januari 2019. Local Store Aruba ta un otro ehempel cu no ta tuma hopi pa haci un diferencia si di berdad nos ta stima locual ta di nos.

Manera conoci, gobierno di Aruba a anuncia cu lo introduci un ley caminda entrante 1 di januari 2019 lo prohibi importacion y produccion di productonan di plastic, Oxybenzone y Styrofoam. Curt Harms, un di e doñonan na restaurant & bar popular Local Store ta bisa cu semper nan tabata na altura di e problemanan cu plastic di solo uzo ta causa mundialmente. “Akinan na Aruba mes mirando e saconan den mondi y cosnan asina ta problema mundial tambe,” segun sr. Harms. E ta sigui bisa cu “fuera di e problemanan den medio ambiente, nos a ripara tin aprecio grandi den nos clientenan local y turista pa movecionnan cu nos a haci te hasta ora nos no mester haci e.” Pa Aruba den general mes tumando e paso aki como un di e lidernan den e region lo ta algo hopi beneficioso cu lo sigur wordo aprecia den exterior segun sr. Harms ta splica. Sr. Harms ta bisa cu esaki no ta un accion cu ta solamente positivo pa nos medio ambiente, pero sigur tambe ‘pa bo saco como comerciante’ segun sr. Harms.

Beneficio pa medio ambiente y pa bo cartera!
Cierto pasonan cu Local Store a tuma por ehempel ta pa nunca uza saconan di plastic, semper nan a uza productonan di carton. “Tur ora cu tin algo den direccion di productonan sostenibel, semper nos ta bay escoge p’e,” sr. Harms ta bisa. Ultimamente por ehempel nan a haya varios straw di papel di diferente calidad. “Si bo no kier haci e pa medio ambiente, haci e pa bo cartera. Pasobra bo ta bay haya un aprecio for di bo clientenan y e bonus ta cu nos ta cuida medio ambiente na mes momento di biaha,” segun sr. Harms.

Fasenan di implementacion Choose Zero
Aña 2019 ta conta manera un periodo di transicion den e campaña titula Choose Zero. Durante e periodo aki lo tin conscientisacion no solamente na localnan pero tambe pa nos turistanan. E meta ta pa cuminsa na conscientisa e consumidor y comerciantenan tocante e variedad di productonan alternativo y con nos por facilmente biba sin e uzo di plastic. E prohibicion mes lo bay den efecto riba 1 di januari 2019, pero e siguiente fase lo ta e sancionnan cual lo cuminsa wordo parti desde 2020. Esaki pa duna tur tempo necesario pa e transicion por bay adecuadamente. E prohibicion ta conta pa importacion, produccion y benta di productonan cu lo aparece riba e lista di prohibicion. E lista aki lo por wordo expandi den futuro cu mas productonan cu ta contene ingredientenan dañino na nos medio ambiente y naturalesa.

Leave a Reply

Your email address will not be published. Required fields are marked *