fbpx

| Choosezero, News

Prohibicion di plastic y styrofoam ta pasonan chikito pa cambionan grandi

ORANJESTAD – Gobierno di Aruba a recientemente introduci un ley caminda cu entrante 1 di Januari 2019 lo bin un prohibicion riba importacion y produccion di productonan di plastic, oxybenzone y styrofoam. Algun negoshi ya caba a cuminsa tuma e iniciativanan aki no solamente cu e durabilidad di nan negoshi na mente, pero sigur tambe pensando riba e sostenibilidad di nos medio ambiente y naturalesa, pa cual nos tur mester semper tin na pecho.

Nos tin hopi ehempelnan bibo riba nos isla cu ya caba a cuminsa bay un stap mas dilanti den conservacion di nos naturalesa y sostenibilidad. Tin varios negoshi tambe cu tin algun tempo caba ta premira cu a yega ora pa Aruba pone un stop na uzo di plastic.  Dylan Molina ta Director of Sales & Marketing di Pelican Adventures, Pelican Nest y tambe Monforte Luxury Cruise.

Dylan ta bisa cu locual a inspira Pelican Adventures pa move mas den e area di sostenibilidad ta e durabilidad di no solamente e compania, pero sigur e medio ambiente y naturalesa. Nan mester di nos medio ambiente y naturalesa den e trabao cu nan ta haci tur dia. No solamente esey, nan mester pa nos medio ambiente y naturalesa ta den un bon estado, bunita y limpi pa nos bishitantenan y seguramente pa nos localnan. E ta nan pan di tur dia. Pues nan a cuminsa tuma varios paso caba  sabiendo cu eventualmente Aruba mester cuminsa move den e area mas sostenibel.

Cuida locual ta di nos
E compania aki a dicidi caba di cambia tur nan styrofoam boxes pa carton (biodegradable), tur nan straw ta cambiando actualmente na paper straws cual ta haci un diferencia grandi.
Monforte Luxury Cruise no ta uza ningun plastic di solo uzo riba e boto, pues tur e cupsnan ta re-uzabel (re-usable hard plastic), e lunchnan no ta prepara riba tayonan di plastic di solo uzo tampoco. “Nos ta tumando paso pa asina poco poco den e ramo di 2019 nos por move tur y stop di uza tur plastic di solo uzo y solamente tin productonan re-uzabel of bio-degradable”, segun Dylan.

Beneficionan di no uza plastic
Dylan ta bisa cu tin varios beneficio den no uza plastic di solo uzo y styrofoam.  E beneficio di mas grandi primeramente segun Dylan tin di haber cu e durabilidad y ‘long-term goal’ pa locual ta nos medio ambiente y naturalesa. “Mi ta kere cu nos ta wak mas di loke ta nos futuro. Nos kier cuida nos medio ambiente. Nos kier cuida tur e beachnan, nos no kier pa tin plastic tur caminda, nos no kier pa e tortuganan of piscanan haya plastic.”

Nan ta haya cu ta importante pa no solamente nan como compania stop di uza e plastic di solo uzo y styrofoam, pero pa e resto di comercio tambe cuminsa tene esaki den consideracion. “Tur nos tours tin mester di nos medio ambiente, pues ta importante pa nos pa cuida e durabilidad di Aruba como un producto turistico, y tambe un luga caminda nos ta cuida nos medio ambiente”, Dylan ta comenta. E ta sigui bisa cu: “Esaki ta crea un conexion grandi cu nos turistanan cual ta bin Aruba netamente pa e beachnan, naturalesa, pa nan por relax den loke nos ta ofrece.”

Fasenan di implementacion Choose Zero
Aña 2019 ta conta manera un periodo di transicion den e campaña titula Choose Zero. Durante e periodo aki lo tin conscientisacion no solamente na localnan pero tambe pa nos turistanan.
E meta ta pa cuminsa na conscientisa e consumidor y comerciantenan tocante e variedad di productonan alternativo y con nos por facilmente biba sin e uzo di plastic. E prohibicion mes lo bay den efecto riba 1 di januari 2019, pero e siguiente fase lo ta e  sancionnan cual lo cuminsa wordo parti desde 2020. Esaki pa duna tur tempo necesario pa e transicion por bay adecuadamente. E prohibicion ta conta pa importacion, produccion y benta di productonan cu lo aparece riba e lista di prohibicion. E lista aki lo por wordo expandi den futuro cu mas productonan cu ta contene ingredientenan dañino na nos medio ambiente y naturalesa.

Comments are closed.