fbpx

| Choosezero, News

Manera conoci, gobierno di Aruba recientemente a anuncia cu entrante 1 januari 2019 lo bin un prohibicion riba importacion y produccion di productonan di plastic di solo uzo, oxybenzone y styrofoam. Algun companianan local ya caba a cuminsa uni forsa pa engrandece e iniciativa aki y asina habri caminda na un Aruba mas sostenibel.


“No mester tene miedo pasobra esaki ta un cambio pa e miho. Pa negoshinan, nunca bo lo sobrevivi sin pasa over di retonan y keda re-inventa bo mes, pa ta dinamico. E cambio aki ta pa miho y ta pa haci bo mas fuerte”, segun Jessica Posner, Marketing Manager na Aruba Aloe. Aruba Aloe a ser funda na 1890 na Aruba, y cu esey e no ta solamente e prome compania di Aloe na mundo, pero tambe un di e companianan mas bieu aki na Aruba. Cu mas di 125 aña di experiencia trahando cu nos Aloe, nan ta traha actualmente productonan cosmetico pa cuido di cabey y cuero.

Pa Aruba Aloe, e prioridad ta calidad di servicio y producto cu nan ta ofrece, e ta locual ta mas importante pa nan semper keda optimal.  Y cu esey naturalmente ta bin e efectonan cu e tin pa nos medio ambiente of e salud di nos hendenan mes. “Nos semper ta mantene nos mes up-to-date cu tur e trendsnan cu tin internacionalmente, y tambe estudionan cu ta wordo haci cu ingredientenan cu tin den nos productonan”, segun sra. Posner.

Un cambio necesario y inevitabel
Asina cu Aruba Aloe a haya sa cu oxybenzone ta e ingrediente primario cu ta wordo uza pa sunscreen ta dañino pa nos coralnan, nan a cuminsa desaroya un producto nobo mesora.
“Nos ta kere cu nos liña nobo di sunscreen ta hasta hopi mas miho cu locual nos tabata tin prome pasobra e ta ofrece tur e mesun beneficionan cu e tabata ofrece prome”, segun sra. Posner. E sunscreen nobo aki ta hopi resistente na awa, e ta proteha bo di e solo y no ta haci daño na nos coralnan, pues e producto a wordo mehora.  E oxybenzone ta e ingrediente primario pa protege bo cuero contra solo. Locual cu oxybenzone ta haci, e ta wordo absorba door di e cuero y ora cu wordo expone na rayonan di solo, e oxybenzone ta cambi’e den un calor cu no ta malo pa bo y sac’e for di e cuero pa e no tin efecto negativo riba bo cuero. Titanium, Dioxide y Zinkoxide ta mineralnan cu ta forma un barera riba bo cuero y no ta wordo absorba mes door di e cuero. Sra. Posner: “Pa nos coralnan, ora nos bay den lama cu sunscreen, e ta keda den lama y oxybenzone ta afecta e algea. Y asina tambe afecta e coralnan, asina nan ta muri. Oxybenzone no ta e unico peliger na nos coralnan pero e ta esun di mas grandi.”

Nos naturalesa y lama ta locual cu miles di turista tur dia ta bin Aruba pa admira. E ta e rikesa cu nos tin. Nos isla ta asina chikito, cu cada efecto cu nos haci riba dje ta afecta nos grandemente. Kiermen cu e ta algo hopi importante pa semper corda pa cuida locual ta di nos. “No solamente pa nos mes pero naturalmente pa nos yiunan y e generacionnan cu ta bini tambe”, sra. Posner ta remarca.

Comments are closed.